,,ევროპული საქართველოს’’ სარჩელი ფოთის საქალაქო სასამართლომ ნაწილობრივ დააკმაყოფილა

get_img

ფოთის საქალაქო სასამართლომ ,,ევროპული საქართველოს’’ ფოთის ორგანიზაციის სარჩელი # 70-ე საოლქო-საარჩევნო კომისიის წინააღმდეგ
ნაწილობრივ დააკმაყოფილა.ოპოზიციური პარტიის წარმომადგენლები 31-ე უბნის შედეგების გაბათილებას ითხოვდნენ.

ოპოზიციის მტკიცებით, 31-ე უბანზე თავმჯდომარემ საარჩევნო ყუთში 100 -მდე ბიულეტენი ჩაყარა. ,,ევროპული საქართველოს“ წევრები ასევე მოითხოვდნენ 31 -ე უბანზე მყოფი მათი დამკვირვებლის გრიგოლ სტურუას საჩივარი 70-ე საოლქო საარჩევნო კომისიას განხილვაში მიეღო, რაც სასამართლოს დღევანდელი გადაწყვეტილებით დაკმაყოფილდა.

როგორც ,,ევროპული საქართველოს“ წევრმა გიგა გვასალიამ msnews.ge -ს განუცხადა: ,,საოლქო-საარჩევნო კომისიის მიერ ჩვენი განცხადება-საჩივრის განხილვა მოხდება. განხილვის დროს აუცილებლად დავაყენებთ საკითხს 31-ე უბნის ბათილობაზე , რადგან სახეზეა გაყალბების არაერთი ფაქტი სამწუხაროა, რომ 31-ე უბნის ბათილად ცნობის შესახებ სასარჩელო მოთხოვნა არ დაკმაყოფილდა , რაც ჩვენი აზრით არ არის საფუძვლიანად დასაბუთებული. ჩავიბარებთ სასამართლოს გადაწყვეტილებას, გავივლით კონსულტაციებს და ვაპირებთ გასაჩივრებას სააპელაციო სასამართლოში“.

გვასალიასვე მტკიცებით „ოპოზიციის მხრიდან 31-ე უბანზე საჩივარი დაწერილია საარჩევნო ყუთში ბიულეტენების ჩაყრის ფაქტზე. ამასთან დაკავშირებით უბნის კომისიის თავმჯდომარეს დავით ხეცურიანს შემდეგი პასუხი ქონდა -„საჩივრის ავტორი გავაძევე უბნიდან. ამასთანავე აღმოჩენილი იქნა ბიულეტენები, რომლებიც ,,ქართული ოცნების“ მიერ დანიშნულმა კომისიის წევრმა მოიპარა და ყველა ბიულეტენში შემოხაზულია #41 .ეს ფაქტები ცხადყოფს, რომ 31-ე უბანზე ადგილი ჰქონდა გაყალბებას რაც ამომრჩევლის ნებას ეწინააღმდეგება“.

ოპოზიციის წარმომადგენლების თქმით ისინი აქციებს გააგრძელებენ მანამ, სანამ საოლქო-საარჩევნო კომისია 31-ე უბანზე გაყალბებას არ დაადასტურებს.


კომენტარები სტატიაზე